​ភ្នំពេញ ៖ បន្ទាប់ពី​សមាជិកសភា មកពី​គណបក្ស​សង្គ្រោះ​ជាតិ ធ្វើពហិការ​មិន​ចូលរួម​ប្រជុំ​សភា ជាច្រើនលើក​ច្រើនសារ​ម​ក រដ្ឋសភា​បាននិងកំពុង​ពិនិត្យ​លើ​ករណីនេះ ពិសេស​នោះ​ប្រាក់បៀវត្សរ៍​តែម្តង ។ នេះ​ជាការ​បញ្ជាក់​របស់​ឯក​ឧ​ត្ត​ម​ឈាង វុន​អ្នកនាំពាក្យ​រដ្ឋសភា​កម្ពុ​ជា នា​ព្រឹក​ថ្ងៃទី​៦ ខែមិថុនា ក្រោយពី​បញ្ចប់​កិច្ចប្រជុំ​គណៈកម្មាធិការ​អចិន្ត្រៃយ៍​ដើម្បី​កំណត់ របៀបវារៈ​លើ​ការសាកសួរ​រដ្ឋមន្ដ្រី ក្រសួងយុត្តិធម៌​។​

​ឆ្លើយតប នឹង​សំណួរ​ក្រុម​អ្នកសារព័ត៌មាន​អំពី ថា​តើ​រដ្ឋសភា​នឹងមាន​វិធានការ​យ៉ាងណា​សម្រាប់​ស​មា​ជិ​ក​សភា​គណបក្ស​ស ង្គ្រោះ​ជាតិ ដែល​មិន​ចូលប្រជុំ សភា​នោះ​? ឯកឧត្តម​ឈាង វុន បាន​បញ្ជាក់ថា រដ្ឋសភា​នឹង មិន​ផ្តល់ប្រាក់​បៀវត្សរ៍ ដល់​សមាជិកសភា​ណា​ដែល​មិន​ចូលធ្វើការ​នោះទេ​។​

​ការលើកឡើង​របស់ ឯកឧត្តម​ឈាង វុន ទំនងជា​សំដៅទៅ​កាន់​ក្រុម​អ្នកតំណាងរាស្ត្រ គណបក្ស​សង្គ្រោះ​ជាតិ  ដែល​ធ្វើបាន​ពហិការ មិន​ចូលប្រជុំ​សភា ដោយហេតុ​ផល​ថា​អភ័យឯកសិទ្ធិសភា​ពុំ​ត្រូវបាន​ការពារ​។​

​ពាក់ព័ន្ធ ករណីនេះ រស្មី​កម្ពុជា​បាន​ព្យាយាម​ទាក់ទង​ទៅ​អ្នកនាំពាក្យ​គណបក្ស​សង្គ្រោះ​ជាតិ តែ​ទូរស័ព្ទ​តេ​ចូល​បែរជា​គ្មាន​អ្នកទទួល​នៅ​រសៀល​នេះ​៕

​